Жаңаөзен тұрғыны, 56 жастағы Қаныбек Құлжановтың отбасы дәрігерлердің әрекетіне шағым түсірді, деп жазады Alash.kz.
Ер адам бір ай бұрын жүрегі сыр беріп, ауруханаға түскен. Дәрігерлер жоспарлы ота жасағанымен, одан кейін науқасты бес күн бойы туыстарына көрсетпеген.
Арада апта өткен соң ғана дәрігерлер оның жұбайын шақырып, науқастың өкпесі қарайып кеткенін, қабырғасы қайысқанын хабарлаған. Осыдан кейін науқастың жақындары күмәнданып, жағдайдың жай-жапсарын анықтай бастаған.
Кейіннен реаниматолог дәрігердің өзі болған жайтты әшкерелеп берген. Тіпті жиналыс кезінде жазылған аудиожазбада: “Көп болса, Маңғыстаудың бір адамы өледі. Несіне қиналасың” деген сөздер айтылғаны белгілі болды.
Науқастың әйелі полицияға арыз түсірді. Қазір қылмыстық іс қозғалып, кінәлі дәрігерлердің іс-әрекеті тергеліп жатыр. Ал Қаныбек Құлжанов жансақтау бөлімінде ауыр халде ем қабылдап жатыр.
