Польшада халықаралық AirShow Radom авиашоуына дайындық кезінде қайғылы жағдай болды. Әскери ұшқыш, майор Мацей Краковян жаттығу барысында апатқа ұшырап, қаза тапты, деп хабарлайды Alash.kz.
Оқиға 28 тамыз күні орын алды. F-16 жойғыш ұшағы әуе маневрі кезінде басқарудан шығып, ұшу-қону жолағына құлаған соң отқа оранған. Көрермендер мен техникалық қызметкерлердің арасында зардап шеккендер жоқ.
Трагедиядан кейін ұйымдастырушылар 30–31 тамыз күндері өтуі тиіс авиашоуды толығымен тоқтату жөнінде шешім қабылдады. Бұл шара жыл сайын ондаған мың көрерменді жинайтын Польшадағы ең ірі авиациялық оқиға болып саналады. Биыл оған 20 елден 150-ден астам ұшақ қатысады деп жоспарланған еді.
Мацей Краковян Польша ӘӘК-нің ең тәжірибелі, әрі біліктілігімен аты шыққан ұшқыштарының бірі болатын. Ол F-16 Tiger Demo Team тобының жетекшісі ретінде ел ішінде де, шетелде де танымал еді. Шілде айында Ұлыбританиядағы RIAT авиасалонында көрермендер дауысы бойынша “As the Crow Flies Trophy” марапатын иеленген. Әскери сарапшылар оны “поляк әскери авиациясының символы” деп атайтын.
Апаттың нақты себебі әзірге белгісіз. Тергеумен әскери прокуратура мен полиция айналысып жатыр. Болжамдардың ішінде техникалық ақау, пилоттық қателік және ұшқыштың денсаулығының нашарлауы бар. Сарапшылардың айтуынша, бейнежазбадан ұшқыштың соңғы сәтке дейін ұшақты аман алып қалуға тырысқаны анық көрінеді.
